kisaw sa sapa

Ulan

Posted by Gen Omapas , Monday, July 20, 2009 Monday, July 20, 2009

Isumbong ko tanan sa pag-abot niya.
Isugilon ko ang kahaw-ang
sa higayun modaklit sa akong handurawan
ang imong hulagway, ang imong kamot
nga midula sa akong mga buhok
ang mga halok nga mipaulan sa akong aping.
Kay hain na ba sila? Wala na,
kay wala kana usab sa akong kiliran.

Gipili ko ang kalimtan ka.
Gipili ko ang walay kasiguruhan,
basin sa unahan matultol ko
ang tubag sa naglimin ko nga pangutana.

Isumbong ko tanan sa pagbunok sa uwan
og iatol ko kini nga banha pa ang kasikas sa atop
arun dili mo madunggan
ang pagbundak sa pultahan
o mabantayan
ang akong mga tunob sa pagbiya.

Ug iatol ko kining higayuna
nga samtang may ulan pa
nga moanod sa akong mga luha.


photo source: http://i323.photobucket.com/albums/nn445/shyninggstar/raining.jpg

Posted in Balak, Cebuano