ang palabad sa bentilador
inanayng nahimong ferris wheel
gilumos ko sa lumay sa kama
ug ang kapuol gipulihan sa duka
ako ug ang akong ginhawa
nahisum-ok sa usa ka planeta
ug nalanay ang kasikas sa gawas
nunot sa bag-o kong kalibutan
ang aso gadayan-dayan nga kurtina
ang habol nahimong balod sa panganod.
sa akong pagpiyong mosanag ang asul
nga kalimutaw sa iring
ablihan ang mga siradong bintana
mosaka sa hagdanan nga walay ang-ang
mag-iniktin babaw sa atop
magbisekleta padulong sa buwan
dayon ako syang giingnan nga siya ang
dagway sa limbong
ug ako ang gamahanang
may tiil ang akong duha ka mata
may pako ang akong mga kamot
apan ang buwan mibuka sa iyang baba
dayon mitutho ug lawa-lawa
ug gipukotan niya ang akong dunggan
tiil ug kasingkasing
gilumsan sa lim-aw sa alimungaw
napadpad sa sa langob sa pagkahinanok
sa akong mga hagok ako nagtukaw
nangablit ang nerbyus sa akong balahibo
nasaaag sa damgo sulod sa usa ka damgo.
Naglambiyong nga mga kamot, malipayon nga bisan ang ngabil di na mahikabalo sa pagtak-um. Sa akong pamasin, ngano kanunay ko makasaksi niini - duha ka paresang kamot, duha ka abagan'g nagtapot, duha ka masaarong mga pulong nga naghisgot ug kahangturan. Mga talan-awon nga may kaabyan nga hapuhap, sandig ug pagparay'g -- saksi ko sa bakak. Kon kini sama sa usa ka salida, sugilanon nga may nindut nga sinugdanan, taphaw ang katapusan.
Ingon sa mga karaan, ang duha ka mga kalag sa managlahing dapit mahiusa sa usa ka bituon sa langit. Kon batiun nila ang kamingaw dayon moyahat ug mag guhit sa wanang ug pako ug ang landag maoy silbin sulo aron tultolon nila ang isig usa. Ug kinsa'y masayod makasunog diay ang tinutukay sa mata.
Niini ang imong pulong, tataw man apan lisod hubaron. Ang imong kahilom uban sa imong pagginhawa nag-alingawngaw ug pangutana. Kong mahisabtan lang ang sulod sa imong hunahuna ug nganon'g lanog imo kulba sa higayon mangutana ka kon kahibalo ba ko moluto'g pochero bisan sayod kang ang ako masag-o isdang pinirito.
Nangita ka'g kusinera?
Sa pag-inusara ikatugbang ang balde ug planggana,
andam mosapnay sa nagtipun-og nga labhonon.
May kaigmat taliwala sa kaputi ug mga bulok sa panapton,
sa pagpahan-ay sa mga pino'ng piraso layo sa dagko,
sa inampingang nuog lahi sa pantalon.
Bisan ang lilo sa washing machine dili makaasdang
sa kumpas sa kamot dayong humol sa tubig. Di na mistil
mamagnos og chlorine; ang gikusgon sa matag kuso-kuso
dali mopalanay sa gahing mantsa nabulit sa puwang sanina.
Ang pinitik sa pulso sa gikumkomang kahilom
mopatin-aw sa matag banlaw ug puga sa sinabonan.
Dayon iladlad ang bestida gamit ang Perla—ang pinisik
sa sabon molabtik sa mata—halang man apan wala
damha nga dali mopaburot ug manganak og bula.
Tagalog translation:
(para sa isa kong napadpad na tagabasa na kakarampot lamang ang naiintindihan nya sa Bisaya)
PS: pinilit ko mapiga ang kakarampot ko ding alam sa Tagalog..echus!
Bakit mas Hiyang maglaba kapag Heartbroken
Sa pag-iisa kasa-kasama
ang balde at batya
na handang aluin
ang gabundok na labahan
Sigla sa harap ng puti
at samot-saring kulay ng hibla
pagsa-saaayos ng malilit na piraso
mula sa malalake.
ng mga pantalon
mula sa iniingatang tela.
Ang ikot ng washing machine
ay di makkapantay
sa kumpas ng kamay
habang papalubog sa tubig.
Di na nanaisin pang gumamit ng klorin.
Ang sidhi ng bawat kuskos
ay magaang nakakatunaw
ng matigas na mantsa
nakabahid sa pulang blusa.
Ang tibok ng pinagtitimping
katahimikan
nakakapagpalinaw
ng bawat banlaw
at piga ng labahan
At saka magkukula
gamit ang Perla,
ang tilamsik ng sabon
pumipilantik sa mata
maanghang man
ngunit nakakagparami ng bula.
(draft)
Ning taknaa nga ayaay ang palibot
wala gibati'g kalaay ug katulogon ang balod
nga nagsudya sa kangitngit; ang pagpadulong
dili masukod sa milya ug gilay-on.
Ang gilawmon anaa sa kimba sa atong pahiyom.
Ang mata'g tunob sa atong tiil sa bunbon
nagtimaan nga dili tanang laag, saag. Labi na
kon gapabilin kini sa atong panumdoman
lakip sa atong kanta-kanta nga giseprahan
sa hangin-- ang hugyaw sa mga dahon
sa atong pauso ug pasiplat. Ang kaminyoon
ubos sa dan-ag sa buwan namantala
sa atong duha ka palad.
Ug sa paghabol sa kangitngit
ang gilay-on nag-uwang ning gabhiona: usa
ka dangaw gikan sa imong abaga.
sa tissue paper gabadlis ko
ug dakong lingin
nga maguhit sa sulod
ang duha ka mata
ilong ug ang baba
sa akong kaduka,
hulagway mo
akong nakita...
Gen Omapas
(metro gaisano foodcourt, 12 Feb 2011)
nag-inagikik sulod sa jeep
ang manulonda mikunsad
taliwala sa sinaw nga 'celfone"
ug mahalong sinina,
baga nga makeup
makalarag nga pahumot
murag bag-ong hinabwa
nga buy one take one sa merkado sa insik
susama na siya sa kwaknit
sa ka pula sa iyang lipstick
bag-ong pintal nga mga kuko
naglana ang aping sa chin chan su
nagtinagingting ang katapusang silaba sa bagting
sa iyang walay puas nga tira- pasagad
di lagi kuno siya hinawayon
pero maayong pagka han-ay ang saway
sa iyang amigang bag-ong na abogada
sauna pislat ug ilong karun taliwtiw na
nasuya siguro nga siya wala ka pa Vicky Bello
kalit, mituktok sila ug mikanaug sa Sudlon
ang pak-an nga sabaan, nag lubos itom ang sinina
nakapalda murag para-para nga milabang
padulong sa lubos puti nga simbahan.
Mga salin sa tipaka sa mga bituon nga nahimong
bulalakaw nasaag di na maaninaw.
Unsa kaha kon dili na ba hinuon higtugkan
ug kaikag sa alampat nianang bugason nga kalangitan
Motipas sa anino nga panagsa ra magpakita.
Mahikalimot sa takna samtang inanay naaninag
ang panagway sa diwata sa lamparahan sa buwan.
Yano nalang ba ni sila kanimo nga kaniadto gitaral
imong panan-aw niining mga mistikong magdadasig?
Kay lagi ang pagpasiyo sa kagabhiun sama ra
ka kutas himamaton sa makadaghang higayon
ang kamingaw, pagpaabot ug pagpailob.
Motubod raba gilayon ang mga pulong,
sa higayon mangita na ug kapahungawan
ang nagsalimuang nga dughan.
Gisulayan ko sa paghural nga dili magpadani sa lamat
sa alimyon sa mga pulong. Kay ang labtik sa mga titik sakit
daw tunok sa amorseko mamamilit sa mga sidsid.
Nagtapol na usab sila maminaw sa akong balik balik
nga litanya sa paghikalimot, pag-inusara ug pag-antos.
Sum-olan na sad ko maminaw sa akong pakyas
nga panganti sa kaugalingon nga dili na.
Pero ania, hapit na mahuman ang katapusang garay
ning akong linya. May nahabilin pang kaluoy
nag-uylap uylap ning gabhiuna. Mobalik siya.
Kay sa higayon nga magmala ang akong pulong
ma uphag na usab ang akong gugma.
( Sa batang anghel ni Ate Arlene )
mamahimo'ng unlanan ang mga buswak sa rosas
sa pagpaanod mo sa imong pagkahinanok
makighurohuro ang panon sa mga alibangbang
ipadayag ang kalibutan sa ilang mga bulok.
sa imong pagkawili sa kinapusoran sa dagat
paminawa ang taghoy sa sirena magbanlas kanimo
sa balod sa akong kinahiladman.
hangupa ang badlis sa akong mga palad
andam mosapnay sa imong pagtukad
walay katapusang laylay sa kagabhiun
nga ikaw makabaton sa unang tapya sa pag-uha
kung kanus-a ang gapnod sa akong pusod
motabyug ug balik kanatong duha.
nahisugamak ang mga tigpahan-ay sa suhulan
atubangan sa nagkordon nga hi sensored Hitler cam
dire sa ikaptong panganod
sukdon ang kabangis sa pagpitik-ihap sama sa kilat
kung mahapyud pa ba ang way kaligo'ng kalendaryo
kung may igo pa ba'ng lana baghid sa natay-ang utok
nganong niadtong adlaw sa mga maniningil
gidutan ang mamumuo ug 59 sa iyang amo.
tugbang sa 11 ka buwan 8 oras
sa pagdanga-danga sa langit.
mamahimo ba gihapon ang pangatarungan sa 1+0 = 1?
kon ugaling niadtong higayuna nasiplatan ko ikaw
niukab sa imong hinulman nga kodigo?
pagka taphaw baya sa imong pagsuna kanako
sa kabalaka ang akong puwang marka
mo gilaw pa sama sa nagbuyon
nga mga suga sa Fuente ug Jones Ave.
walay pulos ang mga hinis ug liha
sa kubalon kung mga palad sa pagbahin-tabid,
dugang ug kunhod sa milyones dolyares
ipangbisibis ko kining nahibiling sentimos
sa napagtong nga andana niining gi-obrahan tang langit.
dire sa ikalima nimong pangutana:
"compute the alien mandatory contribution
of a 58 yr old Martian Employee with
a 2 light year permanent resident status
having a base salary of 50,000"
Ang akong tubag tadlas niining nanghuy-ab
nga bintana gikan sa nahibilin kong tinta.
ako maghan-ay ug bayranan matag takdol sa buwan
bangaw.bituon.bayle.bungtod.busay.balak
Time's up! da, human ka lagi
Nagtinagaktak ang akong sapatos,
nagdali nga di maabtan sa pagbundak sa ulan.
Sa daklit nga panaw sa Lahug
gisugdan na sa pagsamad ang dalan
sa nagpanon nga mga karo.
Mga busina nagsugid sa sentensya
-mga lunlon parolado sa nagkadaiyang
bilangguan ibalhog na sa ilang gigikanan.
Misuway ako sa pagpara
pakyas puno na ang ilang gisakyan.
Gipaspasan ko ang akong paglakaw
kay sa akong pamasin daw wala pa
ko makatunga sa akong pagpanaw.
Layo pa ang tumoy niining
utlanan padulong sa Busay.
Ang mga bakilid diin ako
kapid-an nahunlak ug mibangon.
Ang matag huros sa hangin nga
miduyog sa akong bahakhak ug pagbakho.
Ang mga aninipot ug mga bakukang
nga dili mobalos sa pagbangutan
kon ugaling dili ko sila panumbalingon.
Kung sayluan ko man, sayud sila
ako mokayab ug mobalik kay ako
taga banwa ug mangangayam.
Nagtinagaktak sama sa nagdaling orasan
ang akong sapatos. Paspasan ko pa sa
paglakaw kay gusto na akong mopauli sa Busay.
Magpasalipod sa nagkisdom nga kahapunon.
Ikyas sa salaud nga akong nahiaguman sa siyudad -
silot nga ilang gipahamtang, Reclusion Perpetua
sa akong pagkig-abyan sa kahilom ug
ang pakiglambigit sa anino sa pag-inusara
--- G. Omapas
(Superbalita: BUS nga puno sa mga pasaherong Iranian national nahulog sa pangpang sa sityo Z, Barangay Cansomoroy, Balamban,Cebu pasado alas 10:00 Domingo sa buntag)
Kung mabitad pabalik ang takna
gikablit nalang unta ka sa mga kumagko
sa balod nga imong maagian sa dalan Toledo.
O kung hinuon ba, ni eskirda
ang hago nimong manibela
sa halapad ug tul-id nga taytayan
sa Sangi ug Dumlog.
Apan, na unsa ba, kalimot na tingali ka
ang mino sa kapalaran mangilad
bisan kapid-an ka pa mag bali sa imong sanina
Pero kung itandi mas tam-is ang huyuhoy
sa hangin nga nanuotsuot diha
sa pangpang sa Balamban
Sayod ko nadani ka lang sa alimyon
sa mga bag-ong tubong balili
nga mituyhakaw sa daplin sa dalan.
Sayod ko niadtong tak-naa ang pahiyom
sa imong asawa ang nagpabiling nangaw-it
sa nahabiling sanga sa imong huna-huna
Kung motadlas man ako pagbalik sa Cansumuroy
Buot kong isipon nga dihang lugara
kauban sa imong mga pasahero,
igo ka lang nagpasalipod diha sa dakong bungtod
nasaag sa pagsuroy taliwala sa bagang kahoy
ug malipayong managhoy sa mga huni
duyog sa imong nalumping nga stereo.
-- G. Omapas
Photo credits: mycebuphotoblog.wordpress.com, cebuimage.blogspot.com
Kantahi ko, dong, samtang kita mag-jogging
Pasagdan tang mag-unhanay
Og duyog ang singot sa atong aping
Sa atong pagsugat sa di maihap nga pagtuyok
Ipidpid og dyutay kanang goma nimong sapatos
Di ko mopaspas o mohinay sa pagdagan
Apas lang kon ikaw akong maunhan
Manganta ta, dong, samtang kita mag-jogging
sa naghuwat nga lunhaw nga hawan
mohangop sa nangamig natong kasingkas
- Gen Omapas
Nakahinumdum lang ko sa miaging tuig diin nagsugod akong pagkamahiligun sa pagmugna ug balak mao ako kining ipatik ug balik dire sa akong bag-ong blog. Nalingaw lang ko'g balik og basa, mga kan-hiay nga mga pagbati nga naglimin sa mga pulong ug linya.
Sugdan sa nako sa pagpatik kining balak nakong English:
Independence
In the evening
when souls hidden
in the catacombs
upon the snores and nightmares
of the squeaking furred passengers
jammed in the traffic of Silence Street.
In the musty alley
hymns of littered libidos
of menaced dogs and bitches
spelled thirsts to parched lips
and of the barren
that speaks of freedom
fluffed in the putrid mouths
and in the snarls
of one fanged beasts
and bloodshot eyes
of Bewildered Republic.
And in the darkness
this limb and spine of mine
lurch in the creaking old bed
crawling beneath the cobwebs
of yellowish linen
hiding behind
the shadows dangling
in the ceiling
from the grips and gutters
drowning in the mist
and this ached and withered body
longs for a plummet
in the abyss
of Atlantis
in the pits of numbness
from one sided
Independence.
Ania pay daghan palihug lang ko ug pislit aning link
Mga Karaang Balak sa Ballooney Babbles
Nabati mo ba kaha ang pagdanguyngoy sa akong dughan
samtang miduyog ang sonata nga "After All" sa taxi
atong gisakyan. May kamingaw bang mihinay ug habol
sa atong nagtanday nga kamot sa dihang hinay-hinay
kitang gitulod paduol sa pantalan.
Ayaw lang katingala kung sa matag pahid
nining panyong puti di ko kaako kanimo sa paglingi.
Gilangay nato ang nahabiling gutlo sa panaad
atubangan sa barko nga nagsenyas na ug pauli.
Napagaw nga nanitsit ang kapanganuran,
pwera bisita, pwera bisita.
Nanghasi ang dagat nga nagtumod
kanimo palayo sa akong gitindugan.
--G. Omapas
Ay tahimik na pupuslit, palabas at hihintayin
ang pagsilip niya. Sa may hardin, ang babaeng
may asul na bolpen, bitbit ang pulutong
nang naunsyaming mga sulat na di man lang
nakatikim nang haplos ni Mamang Kartero.
Walang imik na nakatiklop, nakasingit
sa bawat pahina ng kanyang limang taong kuwaderno.
Mga tinupi-tuping papel na walang padadalhan
laman ay mga titik na nakahalik sa makikinis na pisngi
ng naka linyang sulatan. Mga himutok na nakaluklok
sa bawat sulok ng maninipis na hibla. Nauudlot na tuldok,
di mapunang espasyo at talata ng bawat linya
tanging luha nang tinta ang nakauunawa.
Walang humpay na sulat sa kalaguyong
nakasilip sa may di kalayuan
isang dipa ang tanaw mula sa kalangitan.
-- G. Omapas
Sama kini sa miaging nagalindasay nga kagabhiun. Dungog ang pagpanaguto
sa katre sa matag wandog nimo sa imong gihigdaan. Pipila nalang ka gutlo
ug magbahas na ang kabuntagon ug hangtud karun daw giduslitan pa
ang imong kalimutaw, hapdos ang imong mga mata sa matag agay sa luha.
Sa gawas, nagtukaw uban kanimo ang timos nga alingising nga nagpasipala
sa kawanangan kung nganong niining himatyun nga kagabhiun nagtuaw pa
sa pagmaya ang mga iring sa tukgaran. Makahasol ang ilang pag-alikawrang,
ang ilang tunob mga hinagubtob kampana diha sa imong dunggan.
Ug sa imong pagkawas sa katre, namasin ka mawili sa imong pag-inusara.
Sa bintana, dihay mga ulmigas nagsadya ngparada sa ilang nabitbit nga grasya.
Walay hangin nga mosuway ug tuhop sa imong galamhan. Ug walay kriik
sa nagnganga nga pultahan. Sa nagmabdos nga buwan
walay nag ibid-ibid kaniya ni bisan usa ka bituon sa kalangitan.
Ug sa imong ikaupat nga timpla, ka upat na usab mibiay sa imong huna-huna
ang saag nga mensahe sa usa ka babae nagbalandra sa selpon sa imong bana
"Ramon, I miss you, I love you". Gibati mo ang kahuot sa imong dughan ug
sa gihapon mopadayun ka sa imong pagkutaw sa ikalima nga baso
bisan sayud ka ang kape kung mahutdan na sa asukar wala nay lami.
--- G Omapas
Sa usa ka higayun, sa pagsakay nako ug tren, mitutok ka kanako
sa pangagpas kung ako usa ka langyaw ani nga lungsod o ba kaha
sakpon mo ang akong kahadlok nga nabadlis sa akong mga mata
dhang nikalit ko'g gakos sa akong maleta. Wala ko ikaw panumbalinga
kung nagkatapad man ug sandig ang atong mga abaga.
Kay gusto ko motindug paduol sa drayber ug barawun ang iyang pagduka.
Kahibaw baka pila na ka byahe iyang gitadlas niining dalana?
Niining taknaa, dili na lisod abtun ang kapanganuran
sa matag piyong sa mata ug pagbayaw sa huna-huna.
Ang kapakyas ug paglaum nga nahulma sa matag hunong sa estasyun
inig balik nato ug sakay may sumpay na sa kulang nato nga sugilanon.
Ug sa sunod nakong pag-ikyas palayo sa baryo uban kanimo
di nako malisang nga mosulod sa naghaguros nga sakyanan
dala ang pagpanghambog nga ihunghong ko sa imong dunggan —
Nindut man diay mosakay sa MRT labi nakung dili na kita manganaug
ug mopadayun pa sa pagsakay padulong sa walay kapaingnan.
--- G Omapas
Katahimikan
Itaga mo na sa bato
ang pagsalangsang nang aking mga buto.
Di ako matitinag at matatakot
sa paghampas nang pintuan
sa iyong pag-alis.
Iwan mo na ako.
Iwan mo na ako sa sulok
nang aking pagiisa.
Basagin na ang salamin
na nagiiwan nang mga alaala
ng mga ngiting nagbabalakat kayo.
Di mawawala ang bigat nang luha
sa mga matang na dati
sa iyo ang tagpuan.
Umalis ka na
sa ingay nang aking katahimikan.
Alon
Sa kanyang bisig sariwa ang alaala.
Alalang nagkukubli sa liwanag nang aking isipan.
Sa tahimik na batis nang aking pagiisa,
wangis nang mukha moy umaalon'g malaya.
Sa yakap nang tubig sana'y di na makawala .
-- G Omapas
Sa kilom-kilom, kung mosagol sa kapanganuran
ang puting aso nga binuhot sa akong sigarilyo.
Walay timik ang lantay nga akong gilingkuran
nga nabungol sa kanaas sa bunbon nga
nakubkob sa kumagko sa akong tiil.
Wala panumbalinga ang bahakhak sa mga bata
nga nag-iphanay sa mga kaka nga ilang nasikop
o bisan man ambitan ang tinolang manok
nga nabihag gikan sa tigbakay.
Walay duyog gikan kanako ang rondalla sa mga siloy
ug ang pagdapit sa dan-ag sa lamparilya sa among payag
nga nag-awhag kanako nga ako pasudlon na ug balik
gikan sa tibuok adlaw nakong paghuwat.
--- G Omapas
Walay tayhop sa trompeta ug hinagubtob sa takna
nga madunggan gikan sa nag-ambong panganod
kon dili ang mga hadyong sa mga sakyanan
ug suliyaw sa mga tawo nga minggimaw
sa nag sanga-sangang dalan ubos sa ikapitong andana
niining edipisyo nga akong gibarugan.
Wala nila mabatyagi ang ilang talagsaong panaghibalag
pero ako nga sama sa usa ka batang namuso
nga mingyahat sa akong ulo dayun tisli kanila nga nanglili
sa panag-akob sa ilang mga ngabil uban sa daklit
nga kangitngit nga mihabol sa sayo'ng kabuntagon.
-- G omapas
