Andromeda
Posted by Gen Omapas , Tuesday, February 4, 2014 Tuesday, February 04, 2014
Ang kabuntagon nagsugod sa imong pagdugkal sa yuta ug pagtanom
pagbalik sa mga nangapukan nga saging human sa dakong bagyo.
Igo nalang ta sa pagpiyong sa atong mga mata kun kita mangapuling
sa atong pagyahat sa pagdakop sa panganod.
Ngano tam-is gihapon dimdimon ang tuba matag gabii-
labing mosamot ang iyang kalami kon hisgutan ngano kita ga inusara.
Imo na ba kaha nakaplagan ang dugay na nimong gipangita
human mo masuta nga ang tinuod nga bulok sa akong pagkatao
wala sa akong buhok apan anaa sa akong kalimutaw.
May mga adlaw nga mokatawa gihapon ta bisa'g dili na maapas og hinapay
ang atong nangakalkag nga buhok human hapyud-hapyuron sa hangin.
Ug sa pag-atubag sa samin, mahikalimot nga may kandiis diay nga nagpahipi
sa atong mga tinagidyot nga pahiyom.
Daghan kalibog sa kalibutan nga dili na nato masulbad
sa kun kinsa'y gamugna sa gugma ug naghatag sa pagbati niini.
Nunot sa paglurang sa kagabhiun paminawn usa natong magdungan
og uwang ang mga iro sa di pa sila dagiton sa bakunawa.
Kon wa nay luna sa kasingkasing kasudlan sa tanang kaguol,
iphon ta nalang ang tanang poste atong maagian ug halaran
sa ilang katapusang kukak ang mga baki nga nangaligsan sa dalan.
Unya pasiplat natong lilion kun may mogimaw bang mga bituon sa wanang
diha sa nagilak nga lanaw human sa pagtuang sa ulan.
Post a Comment